Kya tumhe semi-cooked pyaar hua hai?

It all started with Pabs
Hum bole – mujhe tumse behad mohabbat hai
Kya tumhe bhi kabhi pyaar hua hai?
Mujhe doubt hota hai
Tumhe sirf mujhse hee pyaar hai
Wo bhi semi-cooked
Mujhe bhi bohot hua hai
Semi-cooked pyaar
Woh picturon ki tarah aahein bharna
Aur fantasize karna
Ki agar tum mujhe date karte toh kaisa hota
Tum ye kehte, main uss baat par khoob hasti
Hum sex karte, hum cuddle karte
Mixed with so many kisses

Wo semi-cooked pyaar
Jo har call par sochta hai
Ki tum meri aawaaz sun-ne ka bahana kar rahe ho
Aur wo jo kehta hai
Ki tum picture ke wo hero ho
Jise abhi tak pata hee nahi hai
Ki use heroine se pyaar ho chuka hai

Wo semi-cooked pyaar jo gas par chadhaa toh
Kuch aag bhi jali thi shayad
Dheemi si khushboo mujhe aayi
Shayad tumhe bhi aayi thi
Warna hum dono hee
Naak uthaae kyun hote bhala
Logon se bhare iss kamre mein?

Semi-cooked pyaar
Mehak bhi aati hai
Bhoonk bhi lagti hai
Par khaali paet
Khaali dil
Hee sona padta hai